Funcionalidade e liberdade. Estas dúas ideas foron claves durante todo o proceso de deseño desta casa familiar.
A primeira vez que falamos con Diana e con Manuel, xa nos deixaron claro o importante que era para eles ter unha vivenda cómoda, que lles facilitara a vida diaria cos seus tres pequenos, con espazos útiles e funcionais, con moita iluminación natural e con espazos amplos para a vida en familia.
Eles tiñan as ideas claras, e nesa liña traballamos durante todo o proceso de deseño. Proxectamos unha vivenda co foco posto nas vistas cara á Ría de Vigo e en aproveitar a liberdade que outorga contar cun espazo exterior onde desfrutar en familia.
Fuximos de imaxes foráneas e empregamos materiais e solucións coñecidas dando como resultado unha vivenda con carácter e personalidade.